Жорий йилнинг 15-25 июнь кунлари Шахмат бўйича Республика ихтисослаштирилган болалар ва ўсмирлар спорт мактабида шахмат бўйича Марказий Осиё давлатларидан минтақавий саралаш мусобақалари ташкил этилди.

Афғонистон, Қозоғистон, Қирғизистон, Туркманистон ва Ўзбекистондан иштирок этган ушбу нуфузли турнирда 32 нафар шахматчилар орасида эркаклар ўртасида  22 ёшли ҳамюртимиз халқаро гроссмейстер Жаҳонгир Воҳидов 9 имкониятдан 7 очко жамғариб олтин медални қўлга киритди.

Кумуш медаль тожикистонлик Муҳаммад Ҳусанхўжаевга насиб этди (6,5 очко).

Биринчи ва иккинчи ўрин соҳиблари 2017 йилнинг 2-28 сентябрь кунлари Грузиянинг Тбилиси шаҳрида бўлиб ўтадиган шахмат бўйича жаҳон кубогида қатнашиш ҳуқуқини қўлга киритди.

Бронза медаль эса қозоғистонлик Пётр Костенко томонидан қўлга киритилди (6 очко).

Ёш бўлишига қарамасдан ҳамюртларимиз Жавоҳир Синдаров ва Нодирбек Абдусатторовлар ҳам шунча кўрсаткич билан турнир совриндорлари сафидан ўрин эгаллашди.

Олтинчи ўринни Туркманистон вакили Сапармурат Атабаев эгаллади (5,5 очко).

Аёллар ўртасида қозоғистонлик Динара Садаукасова тай-брейкда ўзбекистонлик Гулруҳбегим Тоҳиржоновани 2:0 ҳисобида мағлуб этиб, олтин медаль ва аёллар ўртасида шахмат бўйича жаҳон чемпионатида иштирок этиш ҳуқуқини қўлга киритди.

Гулруҳбегим Тоҳиржонова кумуш медаль билан чекланди. Бронза медални эса ўзбекистонлик яна бир шахматчи қиз Севара Боймуродова қўлга киритди.

Шунингдек, Ўзбекистон вакилаларидан Сарвиноз Қурбонбоева, Нодира Нодиржонова ва Баҳора Абдусатторова ҳам совринли ўринларни эгаллашди.

Фото: uzchess.uz